Акафистник - Сборник

Радуйтеся, единомысленныя сестры, трием добро детелем тезоименитыя:

Радуйтеся, в повиновении Богомудрей матери вашей на степени совершенствования вшедшыя.

Радуйтеся, аки три райския ветви, в зловернем Риме возрасшыя:

Радуйся, Софие, дщерем твоим имена добродетелей нарекшая, яже вещию исполняти научила еси.

Радуйся, Веро, верою невидимое, яко видимое, зрети нам помогающая:

Радуйся, в нетление облеченная. Радуйся, Надеждо, надеждою страдания наша во юдоли скорби ослабляющая и в горняя десницею указующая:

Радуйся, Царствие Небесное унаследовавшая. Радуйся, Любы, любовию Божественною блаженство безсмертныя жизни нам открывающая: Радуйся, благодатию Духа Святаго осиянная. Радуйся, Софие, сиесть премудрость, премудре дщери твоя воспитавшая:

Радуйся, в добродетелех веры, надежды и любве нас утверждающая.

Радуйтеся, Веро, Надеждо и Любы, купно с

Софиею, материю вашею премудрою.

Видящи мудрая София слуги, пришедша звати ю со дщерьми ко царю Адриану, и познавши вину призвания своего, ста со чады своими на молитву, помощи Бога просящи: по молитве же, емшася за руце, якоже венец уплетенный, идяху вкупе, поюща Христу Богу: Аллилуиа.

Разум несумненный имели есте, святыя, егда бо в палаты царския введены бысте, цареви Адриану предстаете с лицем светлым, очесы веселыми и сердцем мужественным. Царь же, зря честная лица ваша неустрашенна и мудрость Софии уведев, отложи на ино время суд свой и отела вы к некоей благородней жене, у неяже пребысте три дни, матери вашей премудрей Богодухновенными словесы день и нощь вас поучающей. Темже ублажающе вас, взываем сице:

Радуйтеся, три непорочныя агницы Христовы, венец добродетелей в себе совокупившыя:

Радуйся, три добродетельныя сестры, твердую веру, несумненную надежду и нелицемерную любовь ко Господу Богу явившыя.

Радуйтеся, не пощадевшыя красоты и младости вашея, Краснейшаго ради добротою паче сынов человеческих:

Радуйся, Софие, чада твоя возлюбленная на подвиг мученическ за Христа наставлявшая.

Радуйся, Веро, мучением за Христа веру твою исповедавшая:

Радуйся, сестры твоя крепкою верою воздвизавшая.

Радуйся, Надеж до, твердое надеяние на Христа возлагавшая:

Радуйся, сестры твоя неослабною надеждою укреплявшая.

Радуйся, Любы, муками за Христа любовь твою действенную показавшая:

Радуйся, сестры твоя огнем любве ограждавшая.

Радуйся, Софие, сладкая чада твоя увещававшая презрети славу и богатство и всю сладость мира сего тленнаго:

Радуйся, добрыя дщери твоя до крове стати за Господа и умрети за Него усердно учившая.

Радуйтеся, Веро, Надеждо и Любы, купно с Софиею, материю вашею премудрою!

Силою Божественною осенены бяху мученицы яже добродетели имен своих явиша делом в подвизех мученических, воспевающа Богу: Аллилуиа.

Имуща в себе святыя мученицы столп веры, криле надежды и огнь любве, в сладость послушающа от словес мате ре своея, едина другую в долготерпении утверждаху и радостно идяху, желающа честнаго мученичества, еже за Христа. Тому покланяющеся, яко Богу нашему, сицевыми вас воззваньми почитаем:

Радуйтеся, ни мало не поскорбевшыя о лишении временнаго сего живота вечныя ради жизни: Радуйтеся, чести ради Христовы плоть на муки предавшыя.

Радуйтеся, три многоценныя сосуды веры, надежды и любве Богу в дар принесшыя:

Радуйся, Софие, яко, любве ради презельныя ко дщерем твоим, всем сердцем возжелела еси, да Царствие Божие наследуют.

Радуйся, Веро, душы наша верою озаряющая: Радуйся, к тихому пристанищу нас возносящая. Радуйся, Надеждо, сердца наша сладостию надежды оживляющая:

Радуйся, из пучины отчаяния нас извлекающая.

Радуйся, Любы, страдания и скорби наша в радость прелагающая:

Радуйся, окамененная сердца наша во умиление преводящая.

Радуйся, Софие, мудростию на благое нас наставляющая:

Радуйся, потемненное око душ наших просвещающая.

Радуйтеся, Веро, Надеждо и Любы, купно с Софиею, материю вашею премудрою!

Буря ярости мучителевы нападе на тя, святая Веро, но не поколеба тя: кто бо возможет веру неодолимую подвигнути, адаманта крепчайшую, яже верных научила есть пети с тобою Богу: Аллилуиа.

Слышащи мудрая мати дщери своя пред царем небоязненно Христа исповедающа, и глаголюща, яко того единаго желают, еже бы страдати и терпети горкия муки ^ладкаго ради Иисуса Христа, радовашеся вельми и моли Бога, да укрепит я в предлежащих муках. Сие убо изволение похваляюще, первейшей дщери мудрыя матере тако воспоем:

Радуйся, Веро, немилосердая биения сладчайшаго ради Иисуса сладце приемшая:

Радуйся, урезанная сосца твоя, аки два крина чистоты, в жертву Господу принесшая.

Радуйся, яко от язвы твоея вместо крове млеко истече:

Радуйся, яко на раскаленное железо положена была еси.

Радуйся, яко в коноб кипящь ввержена сущи, ни мало не опалилася еси, ниже вредилася еси:

Радуйся, пламень страстей наших небесною прохладою утишающая.

Радуйся, огнь мучений наших в болезнех угашающая:

Радуйся, знамением веры посреде напастей нас

знаменающая.

Радуйся, щитом веры во брани со врагом нас покрывающая:

Радуйся, честную главу твою за Главу Церкве, Христа Бога, под мечь радостно преклоншая.

Радуйся, яко обагрением крове твоея, аки червленицею, одеяна, явилася еси очесем Безсмертнаго Жениха твоего:

Радуйся, к желанному краю пришедшая и любимаго Спаса и Господа узревшая.

Радуйтеся, Веро, Надеждо и Любы, купно с Софиею, материю вашею премудрою!

Богозданным звездам уподобилися есте, Веро, Надеждо и Любы, всем бо сердцем прилепившася ко единому вечному животу и красоте неизреченней, Иисусу Христу, скоро шествовасте, во еже умрети за Него и насладитися Божественнаго Его видения, поюща Ему: Аллилуиа.

Видевша добропобедныя сестры святую Веру радостно за Христа пострадавшу, и сами хотяху душы своя за Него положити: царь же Надежду святую начат испытовати, и видев ю с сестрою единомысленну сущу, на муки вдаде ю, обаче ничтоже успе. Мы же, Надежду святую о сицевом ея мудровании ублажающе, воспоем и прославим ю: Радуйся, Надеждо, жестоко биенная, обаче пресветлую надежду на Господа не потерявшая:

Радуйся, муки твоя безропотно в молчании терпевшая.

Радуйся, и нам крепкое терпение подающая: Радуйся, яко в разжженней пещи неопаляема бывши, хвалу Богу возсылала еси.

Радуйся, яко и нас во страданиих хвалити Бога научаеши:

Радуйся, яко ногтьми железными строгана была еси.

Радуйся, нас, сущих в скорбех, лучами надежды осиявающая:

Радуйся, яко чудное некое благоухание от язв твоих исхождаше.

Радуйся, непоколебимое упование на Господа Иисуса неизменно сохраншая:

Радуйся, безнадежность и безсилие в сердцах наших истребляющая.

Радуйся, мечное посечение за Христа радостно приимшая:

Радуйся, ясная деннице, нам, печальми земными угнетенным, мир вечный раскрывающая.

Радуйтеся, Веро, Надеждо и Любы, купно с Софиею, материю вашею премудрою!

Проповедником и Апостолом Богоносным подобны бысте, Богомудрыя сестры: добродетельми бо вашими проповедаете всем верным веру, надежду и любовь ко Господу, Владыце всех, Тому поюща: Аллилуиа.

Возсияла еси, аки солнце, Любы святая, кто бо сице за возлюбленнаго Господа своего можаше стати, якоже Любы, понеже писано есть: крепка яко смерть любы, вода многа не может угасити любве, и реки не потопят ея. Молит ти ся ныне, Любы святая, серафимским пламенем любве ко Господу горящая, обнови окамененная и изеохшая сердца наша, возжги в нас, оскудевших любовию, свет любве, да возлюблыне Господа и вся ближния наша, тебе яко молитвенницу нашу, восхвалим сице:

Радуйся, Любы, яко любве твоея ко Христу води многи прелести мирских не угасиша:

Радуйся, яко вся ласкания и дары царевы отвергши, душу твою за Господа положила еси.

Радуйся, яко любве твоея реки бед и страданий не потопиша:

Радуйся, за Господа Иисуса на колеси протягнутая, жезлием биенная, свердлами прободенная и в пещь огненну вверженная.

Радуйся, яко в лютых муках твоих силою Божиею укрепляема была еси:

Радуйся, кровию твоею, любве ради к Безсмертному Жениху твоему Христу излиянною, в хладных сердцах наших любовь возбуждающая.

Радуйся, яве показавшая нам, яко любве ради вся мучения сладце претерпеваются:

Радуйся, явившая нам, яко любы Божественная приводит к животу вечному.

Радуйся, самою вещию уверившая, яко любы Божественная откровение есть безсмертия:

Радуйся, яко ни каяже мучительства возмогоша разлучити Любовь от любве Христовы.