Молитвенник - Александр Гопаченко

Прокимен, гл. 4: Из уст младенец и ссущих совершил еси хвалу.

На литургии

Антифон 1-ый: Возлюбих, яко услышит Господь глас моления моего. Молитвами Б-цы…

Яко приклони ухо свое мне, и во дни моя призову. Молитвами Богородицы…

Объяшамя болезни смертныя, беды адовы обретошамя. Молитвами Богородицы…

Скорбь и болезнь обретох, и имя Господне призвах. Молитвами Богородицы…

Слава… и ныне… Молитвами Б-цы…

Антифон 2-ой: Веровах, темже возглаголах: аз же смирихся зело. Спаси ны, Сыне Божий, восседый на жребя, поющия Ти: Аллилуиа.

Что воздам Господеви о всех, яже воздаде ми. Спаси ны…

Чашу спасения прииму, и имя Господне призову. Спаси ны…

Молитвы моя Господеви воздам, пред всеми людьми Его. Спаси ны…

Слава… и ныне… Единородный Сыне…

Антифон 3-ий: Исповедайтеся Господеви: яко благ, яко во век милость Его.

Тропарь: Общее воскресение…

Да речет убо дом Израилев: яко благ, яко в век милость Его. Общее воскресение…

Да речет убо дом Ааронь: яко благ, яко в век милость Его. Общее воскресение…

Да рекут убо вси боящиися Господа: яко благ, яко в век милость Его. Общее воскр…

Входное: Благословен грядый во имя Господне, благословихом вы из дому Господня, Бог Господь и явися нам.

Тропарь: Общее воскресение…

Слава: Спогребшеся Тебе крещением…

И ныне: Кондак: На престоле на небеси…

Прокимен, гл. 4: Благословен грядый во имя Господне, Бог Господь и явися нам.

Стих: Исповедайтеся Господеви, яко благ, яко в век милость Его.

Аллилуиа, гл. 1: Воспойте Господеви песнь нову, яко дивна сотвори Господь.

Стих: Видеша вси концы спасение Бога нашего.

За Достойно: Бог Господь, и явися нам, составите праздник, и веселящеся приидите, возвеличим Христа, с ваиами и ветвьми, песньми зовуще: благословен грядый во имя Господа, Спаса нашего.

Причастен: Благословен грядый во имя Господне, Бог Господь и явися нам.

Страстная седмица

На утрени, во вел. понедельник, вторник и среду:

Тропарь, гл. 8 Се, жених грядет в полунощи, и блажен раб, егоже обрящет бдяща: недостоин же паки, егоже обрящет унывающа. Блюди убо, душе моя, не сном отяготися, да не смерти предана будеши, и Царствия вне затворишися; но воспряни зовущи: свят, свят, свят еси, Боже, Богородицею помилуй нас.

Ексапостиларий Чертог Твой вижу, Спасе мой, украшенный, и одежды не имам, да вниду в онь: просвети одеяние души моея, Светодавче, и спаси мя.

Во св. и великий четверток и пяток на утрени:

Тропарь, гл. 8

Егда славнии ученицы на умовении вечери просвещахуся, тогда Иуда злочестивый сребролюбием недуговав омрачашеся, и беззаконным судиям Тебе, Праведнаго Судию, предает. Виждь, имений рачителю, сих ради удавление употребивша: бежи несытыя души, Учителю таковая дерзнувшия. Иже о всех благий, Господи, слава Тебе.

Во св. и великий четверток на утрени:

Кондак, гл. 2

Хлеб прием в руце предатель, сокровенно тыя простирает, и приемлет цену Создавшаго Своима рукама человека: и неисправлен пребысть Иуда, раб и льстец.

На литургии

Прокимен, гл. 7: Князи людстии собрашася вкупе на Господа и на Христа Его.

Стих: Векую шаташася языцы, и людие поучишася тщетным.

Аллилуиа, гл. 6: Блажен разумеваяй на нища и убога, в день лют избавит я Господь.

Вместо Херувимской песни, причастна и «Да исполнятся уста наша» поем:

Вечери Твоея тайныя днесь, Сыне Божий, причастника мя приими: не бо врагом Твоим тайну повем, ни лобзания Ти дам яко Иуда, но яко разбойник исповедаю Тя: помяни мя, Господи, во Царствии Твоем.

Во св. великий пяток Ексапостиларий: Разбойника благоразумнаго, во едином часе раеви сподобил еси, Господи: и мене древом крестным просвети и спаси мя.

На стиховне стихира, гл. 5 Слава, и ныне: Тебе одеющагося светом яко ризою, снем Иосиф с древа с Никодимом, и видев мертва нага непогребена, благосердный плач восприим, рыдая глаголаше: увы мне, Сладчайший Иисусе! Его-же вмале солнце на кресте висима узревшее мраком облагашеся, и земля страхом колебашеся, и раздирашеся церковная завеса: но се ныне вижу Тя, мене ради волею подъемша смерть. Како погребу Тя, Боже мой, или какою плащаницею обвию; коима ли рукама прикоснуся нетленному Твоему Телу; или кия песни воспою Твоему исходу, Щедре. Величаю Страсти Твоя, песнословлю и погребение Твое со воскресением, зовый: Господи, слава Тебе.

На целование плащаницы, гл. 5

Приидите, ублажим Иосифа приснопамятнаго, в нощи к Пилату пришедшаго, и Живота всех испросившаго: даждь ми Сего Страннаго, Егоже ученик лукавый на смерть предаде. Даждь ми Сего Страннаго, Егоже ученик лукавый на смерть предаде. Даждь ми Сего Страннаго, Егоже Мати зрящи на кресте висяща, рыдающи вопияше, и матерски восклицаше: Увы мне, Чадо мое, увы мне, Свете мой, и утроба моя возлюбленная: Симеоном бо предреченное в церкви днесь собьются: Твое Сердце оружие пройдет. Но в радость Воскресения Твоего плач преложи.

Покланяемся страстем Твоим, Христе (трижды) и святому Воскресению.

В вел. пяток и субботу, тропари, гл. 2

Благообразный Иосиф, с древа снем Пречистое Тело Твое, плащаницею чистою обвив и вонями во гробе нове покрыв положи.

Слава: Егда снисшел еси к смерти, Животе бессмертный, тогда ад умертвил еси блистанием Божества: егда же и умершия от преисподних воскресил еси, вся силы небесныя взываху: Жизнодавче, Христе Боже наш, слава Тебе.

И ныне: Мироносицам женам, при гробе представ Ангел, вопияше: мира мертвым суть прилична, Христос же нетления явися чужд.

На литургии Великой Субботы Вместо херувимской песни: Да молчит всякая плоть человеча, и да стоит со страхом и трепетом, и ничтоже земное в себе да помышляет. Царь бо царствующих, и Господь господствующих приходит заклатися, и датися в снедь верным. Предходят же Сему лицы Ангельстии со всяким началом и властию, многоочитии херувими и шестокрылатии серафими, лица закрывающе, и вопияще песнь: аллилуиа (трижды).

Из цветной триоди святой пятидесятницы

В святую и великую Неделю Пасхи

Стихира при крестном ходе перед утреней: Воскресение Твое, Христе Спасе, Ангели поют на небесех: и нас на земли сподоби чистым сердцем Тебе славити.

Тропарь Христос воскресе из мертвых, смертию смерть поправ и сущим во гробех живот даровав.

Ирмосы канона

1. Воскресения день, просветимся, людие: Пасха, Господня Пасха: от смерти бо к жизни и от земли к небеси, Христос Бог нас приведе, победную поющия.

3. Приидите, пиво пием новое, не от камене неплодна чудодеемое, но нетления источник из гроба одождивша Христа, в Немже утверждаемся.

Ппакои, гл. 4: Предварившия утро яже о Марии, и обретшия камень отвален от гроба, слышаху от Ангела: во свете присносущнем Сущаго, с мертвыми что ищете яко человека? Видите гробныя пелены: тецыте и миру проповедите: яко воста Господь, умертвивый смерть, яко есть Сын Бога, спасающаго род человеческий.

4. На Божественной стражи, богоглаголивый Аввакум да станет с нами и покажет светоносна Ангела, ясно глаголюща: днесь спасение миру, яко воскресе Христос яко всесилен.

5. Утренюем утреннюю глубоку, и вместо мира песнь принесем Владыце, и Христа узрим правды Солнце, всем жизнь воссияюща.

6. Снисшел еси в преисподняя земли и сокрушил еси вереи вечныя, содержащия связанныя, Христе, и тридневен, яко от кита Иона, воскресл еси от гроба.

Кондак, гл. 8: Аще и во гроб снисшел еси, Бессмертие, но адову разрушил еси силу и воскресл еси яко победитель, Христе Боже, женам мироносицам вещавый: радуйтеся! и Твоим Апостолом мир даруяй, падшим подаяй воскресение.

7. Отроки от пещи избавивый, быв человек, страждет яко смертен, и страстию смертное в нетления облачит благолепие, един благословен отцев Бог и препрославлен.

8. Сей нареченный и святый день, един суббот царь и господь, праздников праздник и торжество есть торжеств, в оньже благословим Христа во веки.

Припев: Ангел вопияше Благодатней: Чистая Дево, радуйся! и паки реку: радуйся! Твой Сын воскресе тридневен от гроба, и мертвыя воздвигнувый: людие, веселитеся!

9. Светися, светися, новый Иерусалиме: слава бо Господня на тебе воссия: ликуй ныне и веселися, Сионе! Ты же чистая красуйся, Богородице, о восстании Рождества Твоего.